سرگودھا: امریکہ سے آنے والے چار ایف سولہ طیارے پاک فضائیہ میں شامل کر لئے گئے۔ مزید چار ایف سولہ طیارے اٹھائیس جولائی کو پاکستان کے حوالے کئے جائیں گے۔ ایف سولہ طیاروں کی حوالگی کی سادہ اور پروقار تقریب مصحف ایئربیس سرگودھا میں منعقد ہوئی۔ امریکی فضائیہ کے سینٹرل کمانڈ کے سربراہ لیفٹیننٹ جنرل گیری ایل نارتھ نے طیاروں کو ڈپٹی چیف آف ایئر اسٹاف آپریشنز ایئر مارشل راؤ قمر سلیمان کے حوالے کیا۔

اس موقع پر پاک فضائیہ اور امریکی فضائیہ کے اعلیٰ عہدیدار بھی موجود تھے۔ چاروں طیاروں کی آپریشن صلاحیت پاک فضائیہ کے بیڑے میں پہلے سے موجود ایف سولہ طیاروں کے برابر ہے۔ ان طیاروں کی پاکستان کو فراہمی کے بعد پاک فضائیہ کی دفاعی صلاحیتوں میں مزید اضافہ ہو گا۔