پشاور: قاضی حسین احمد کا کہنا ہے کہ پاکستان کو طالبان سے کوئی خطرہ نہیں حکمرانوں کی پالیسیاں عوام میں تشویش پیدا کر رہی ہیں۔ طالبانائزیشن کی وجہ حکومت کی امریکا نواز پالیسیاں ہیں۔ جماعت اسلامی کے امیر قاضی حسین احمد نے پشاور میں پریس کانفرنس سے خطاب میں کہا کہ پاکستان کو طالبان سے کوئی خطرہ نہیں۔ انہوں نے کہا کہ طالبان کو ہوا بنا کر پیش کیا جا رہا ہے۔ جس کا مقصد فوج اور عوام کو لڑانا ہے۔ قاضی حسین احمد نے کہا کہ پاکستان کے نیوکلیئر پروگرام کو طالبان سے نہیں بلکہ امریکا سے خطرہ ہے۔ ان کا کہنا ہے کہ قبائلی علاقوں میں مصنوعی جنگ پیدا کر کے نیٹو فوج کے لئے راستہ ہموار کیا جا رہا ہے۔ قاضی حسین احمد نے کہا کہ پشاور پر طالبان کے قبضے کی خبریں مشیر داخلہ رحمن ملک پھیلا رہے ہیں۔ جماعت اسلامی کے امیر نے کہا کہ ملک میں طالبانائزیشن کی اصل وجہ حکومت کی امریکا نواز پالیسیاں ہیں۔