حیدرآباد: وفاقی وزیر برائے پانی وبجلی راجہ پرویز اشرف نے کہا ہے کہ تیل کی قیمتوں میں اضافے کے باعث بجلی مہنگی کرنا ناگزیر ہوگیا ہے۔ راجہ پرویز اشرف نے حیدرآباد میں نیوز کانفرنس سے خطاب کرتے ہوئے کہا کہ واپڈا کی جانب سے بجلی کے نرخ پر دی جانے والی سبسڈی کے خاتمے کا اطلاق دو سو یونٹ تک بجلی استعمال کرنے والے صارفین پر نہیں ہوگا جبکہ بجلی کے نرخ میں نچلے طبقے کی مشکلات کو مدنظر رکھتے ہوئے رواں ماہ اضافہ کیا جائے گا۔

راجہ پرویز اشرف کا کہنا تھا کہ تھر کے کوئلے کو کارآمد بنانے اور تھر کول پروجیکٹ کے لئے چھبیس سے اٹھائیس جون تک واشنگٹن میں انویسٹر کانفرنس کا انعقاد کیا جائے گا جس میں دنیا بھر سے سرمایہ کار شرکت کریں گے۔ انہوں نے کہا کہ دس جون سے صنعتی شعبے میں بجلی کی لوڈ شیڈنگ ختم کردی گئی ہے اور وہاں چوبیس گھنٹے بجلی فراہم کی جارہی ہے۔ وفاقی وزیر نے ہدایت کی کہ شہروں میں چھ گھنٹے اور دیہی علاقوں میں آٹھ گھنٹے سے زیادہ لوڈ شیڈنگ نہ کی جائے۔