اسلام آباد: جوہری سائنسدان ڈاکٹر عبدالقدیر خان نے کہا ہے کہ وہ آئندہ غیر ملکی میڈیا کو انٹرویو نہیں دیں گے۔ ڈاکٹر عبدالقدیر خان نے آج نیوز سے بات کرتے ہوئے کہا کہ کوریا کو سینٹری فیوجز کی فراہمی کے حوالے سے انہوں نے غیر ملکی خبررساں ادارے کو صدر پرویز مشرف کی کتاب کے متن کا حوالہ دیا تھا اور یہ کہا تھا کہ اس بارے میں صدر مشرف سے پوچھا جائے۔ ڈاکٹر عبدالقدیر کا کہنا تھا کہ خبررساں ادارے نے ان کے انٹرویو کو توڑ مروڑ کر پیش کیا۔ انہوں نے کہا کہ وہ لیفٹیننٹ جنرل خالد قدوائی کے ریمارکس کو پڑھنے کے بعد ردعمل دیں گے۔

ڈاکٹر عبدالقدیر نے بتایا کہ ان کے وکیل نے انہیں مزید انٹرویو نہ دینے کا مشورہ دیا ہے۔ وہ آئندہ غیر ملکی میڈیا کو انٹرویو دینے سے اجتناب برتیں گے۔ ادھر ڈاکٹر عبدالقدیر کی اہلیہ ہنی خان نے آج نیوز کو بتایا کہ اسلام آباد ہائی کورٹ نے ڈاکٹر عبدالقدیر کے وکیل اقبال جعفری کو ہدایت کی ہے کہ وہ اپنے موکل کو کیس کے حتمی نتیجے تک مزید بیانات اور انٹرویو دینے سے روک دیں۔ ڈاکٹر عبدالقدیر کے وکیل نے بتایا ہے کہ مزید بیانات سے کیس پر اثر پڑ سکتا ہے۔ ڈاکٹر قدیر اب کیس کے فیصلے تک کوئی بیان میڈیا پر نہیں دیں گے۔