پشاور: صوبہ سرحد کے سینئر وزیررحیم داد خان نے کہا ہے کہ سوات کے طالبان اور حکومت کے درمیان ڈیڈ لاک ختم ہو گیا ہے۔ اب مل بیٹھ کر امن و امان خراب کرنے والوں کے خلاف حکمت عملی طے کی جائے گی۔ رحیم داد خان پشاور پریس کلب میں پیپلز پارٹی کے یوم سیاہ کے حوالے سے منعقدہ سیمینار کے بعد صحافیوں سے بات کر رہے تھے۔ ان کا کہنا تھا کہ باڑہ آپریشن ٹارگٹ تھا اس لئے خون خرابہ نہیں ہوا۔ سینئر وزیر کا کہنا تھا کہ پشاور سمیت صوبہ میں جو بھی حکومت کی رٹ چیلنج کرے گا اس کے خلاف کارروائی کی جائے گی۔ اس سے قبل سیمینار سے پیپلز پارٹی کے صوبائی عہدیداران نے بھی خطاب کیا۔ ان کا کہنا تھا کہ پی پی پی کو ختم کرنے کے لئے لگائے گئے مارشل لاء نے اسے ملک کی سب سے بڑی جماعت بنا دیا ہے۔ صوبہ سرحد کے دیگر اضلاع میں بھی پیپلز پارٹی کے زیر اہتمام یوم سیاہ کی تقریبات منعقد کی گئیں۔