اسلام آباد: صوبہ سرحد کے وزیراعلیٰ امیر حیدر ہوتی نے کہا ہے کہ سوات میں امن قائم ہونے تک فوج موجود رہے گی۔ صوبائی وزیر اعلیٰ کا کہنا ہے کہ بیت اللہ محسود سمیت سب سے بات ہونی چاہئے۔ آج ٹی وی کے پروگرام نیوز میکر ود نسیم زہرا میں بات چیت کرتے ہوئے وزیراعلیٰ سرحد امیر ہوتی نے کہا کہ باڑہ میں آپریشن کا فیصلہ وفاقی حکومت کا تھا تاہم اس کے لئے درخواست صوبائی حکومت نے کی تھی کیونکہ حالات بگڑ رہے تھے انہوں نے بتایا کہ جرگہ ہماری روایات کا حصہ ہے اس کا باڑہ آپریشن سے کوئی تعلق نہیں ہے۔ امیر حیدر ہوتی نے کہا کہ سوات میں ہونے والے مذاکرات کے اچھے نتائج برآمد ہو رہے ہیں۔ انہوں نے بتایا کہ فضل اللہ گروپ نے حالات پر امن رکھنے کی ذمہ داری قبول کر لی ہے۔

وزیراعلیٰ سرحد کا کہنا تھا کہ سرحد اور فاٹا میں امن و امان کے لئے ہونے والے تمام اقدامات پر مسلم لیگ ق اور مسلم لیگ ن سمیت تمام سیاسی جماعتوں کے پارلیمانی لیڈروں کو اعتماد میں لیا گیا تھا ان کا کہنا تھا کہ بیت اللہ محسود سمیت سب سے بات چیت ہونی چاہئے۔ انہوں نے کہا کہ امریکا پریہ واضح کر دیا گیا ہے کہ یہ ہمارا اندرونی معاملجہ ہے اور اس سے اس کا کوئی تعلق نہیں ہے۔