اسلام آباد: بھارت میں لاپتہ ہونے والی پاکستانی لڑکی سے متعلق آج ٹی وی پر رپورٹ نشر ہونے کے بعد بھارتی حکام نے لڑکی کو وطن واپسی بھیج دیا۔ بھارت کے شہر کانپور میں والد کے ہمراہ رشتہ داروں سے ملنے جانے والی لڑکی نادیہ پاکستان واپس آتے ہوئے دہلی کے ریلوے اسٹیشن پر اپنے والد سے بچھڑ گئی تھی۔ نادیہ کے مطابق وہ چائے کے پیسے دینے باہر گئی تو اس دوران امیگریشن گیٹ بند ہو گیا اور اسے اندر جانے کی اجازت نہیں دی گئی۔

ایک خاتون نے نادیہ کی مدد کی اور اسے کانپور اس کے رشتہ داروں تک پہنچا دیا۔ لیکن نادیہ کے ویزے کی مدت ختم ہو چکی تھی تاہم آج ٹی وی پر گمشدگی کی بروقت رپورٹ نشر کی گئی جس سے بھارتی حکام نادیہ کے ویزے کی مدت ختم ہونے کی وجوہات سے آگاہ ہوئے اور اسے پاکستان واپس بھیج دیا۔ اورنگی ٹاؤن کے رہائشی محمد لیاقت کے مطابق دہلی ریلوے اسٹیشن پر نادیہ کے لاپتہ ہونے کے بعد ریلوے حکام اور پولیس نے انہیں زبردستی اٹاری بھیج دیا۔

جہاں انتظامیہ نے نادیہ کو ڈھونڈھنے میں مدد کرنے کے بجائے نہ صرف تشدد کا نشانہ بنایا بلکہ سامان اور نقدی چھین کر انہیں فوری ملک چھوڑنے کا حکم دیا۔ دوسری صورت میں جھوٹے مقدمہ میں ملوث کرنے کی دھمکی دی۔ آج ٹی وی پر رپورٹ نشر ہونے کے بعد بھارتی حکام نے نادیہ کو پاکستان بھیج دیا۔ نادیہ کی والدہ نے خوشی کا اظہار کرتے ہوئے بھارتی حکام اور آج ٹی وی کی خدمات کو سراہا۔ اپنے گھر والوں کے درمیان پہنچ کر نادیہ بہت خوش ہے مگر اب بھی انڈیا میں بہت سے ایسے پاکستانی موجود ہیں جو اپنے اہل خانہ تک پہنچنے کے لئے بے چین ہیں۔