لاہور: ہائیکورٹ بار راولپنڈی بنچ کے صدر سردار عصمت اللہ نے دس جولائی کو شاہراہ دستور پر عظیم الشان ریلی نکالنے کا اعلان کر دیا۔ ریلی میں شرکت کے لئے ملک بھر میں وکلاء کو دعوت دے دی گئی ہے۔ انہوں نے اس بات کا اعلان لاہور میں آل پاکستان ہائیکورٹ بار اسوسی ایشنز کے نمائندہ اجلاس کے بعد ایک پریس کانفرنس کے دوران کیا۔ سردار عصمت اللہ کا کہنا تھا کہ آئندہ لانگ مارچ کی بجائے عدالتوں کی تالا بندیاں کر دی جائے گے جو ججز کی بحالی تک رہے گی۔ انہوں نے کہا کہ عدلیہ کی بحالی کے سلسلے میں مسلم لیگ ن کا کردار بھی واضح نہیں رہا انہیں حکومت یا احتجاج میں سے ایک راستہ اختیار کرنا ہو گا۔

ہائیکورٹ بار کے صدر کا کہنا تھا کہ بار ایسوسی ایشنز کے اجلاس میں آئینی پیکیج کو مسترد کر دیا گیا ہے۔ پریس کانفرنس کے دوران بتایا گیا کہ پی سی او کے تحت حلف اٹھانے والے ججز کے سامنے پیش ہونے والے بار کے عہدیداروں کو مستعفی ہوجانا چاہیے۔ لاہور ہائیکورٹ بار کے سیکرٹری رانا اسد احمد خان نے بتایا کہ انیس جولائی کو لاہور میں ہونے والے آل پاکستان نمائندہ وکلاء کنونشن میں عدالتوں کی تالا بندیوں کے حوالے سے تجویز دی جائے گی اور حتمی تاریخ کا اعلان بھی کنونشن میں کیا جائے گا۔