اسلام آباد: متحدہ قومی موومنٹ کے ڈپٹی کنوینئر فاروق ستار نے کہا ہے کہ صدر کے استعفیٰ دینے کامعاملہ افہام و تفہیم سے حل ہو گیا ہے، اب حکمراں ملک کودرپیش مسائل سے نجات دلائیں۔ آج نیوز سے خصوصی بات چیت کرتے ہوئے متحدہ قومی موومنٹ کے ڈپٹی کنوینئرفاروق ستارنے کہا کہ صدر مشرف نے اس استعفیٰ کے معاملے کو انا کا مسئلہ نہیں بنایا ۔فاروق ستار کا کہنا ہے کہ صدر مشرف نے استعفیٰ دے کرملک اورقوم کے مفاد میں بہترین کام کیا ہے ۔ انہوں نے کہا کہ اب حکومت کو چاہیے کہ ملک کو جو درپیش مسائل ہیں وہ حل کریں۔

ایم کیوایم کے لیڈرکاکہنا تھا اب بال حکومت کے کورٹ میں ہے اور حکومت کو چاہیے کہ ملک سے اقتصادی بحران کے خاتمے اور انتہا پسندی اور دہشت گردی کے جو خطرات منڈلارہے ہیں ان کا خاتمہ کیاجائے۔ایک سوال کے جواب میں فاروق ستار نے کہا کہ قائد تحریک الطاف حسین نے گزشتہ روز حکمران اتحاد اور صدر سے اپیل کی تھی کہ معاملہ افہام وتفہیم سے حل کرلیا جائے اورعین ان کی توقعات کے مطابق فریقین کی جانب اچھا رد عمل سامنے آیا ۔انہوں نے کہا کہ متحدہ قومی موومنٹ موجودہ حکومت کو سوچنے کا پورا موقع دینا چاہتی ہے۔ ججوں کی بحالی کے مسئلے پراورآئندہ حکومتی دھارے میں شمولیت کے حوالے سے ایم کیوایم کے کردارسے متعلق انہوں نے کہا کہ حکمران اتحاد سے بات چیت ہورہی ہے لیکن اب تک کوئی حتمی فیصلہ سامنے نہیں آیا۔