ڈیرہ اسماعیل خان: ڈیرہ اسماعیل خان کے ڈسٹرکٹ ہیڈ کوارٹر اسپتال میں خود کش دھماکا ہوا۔ ایک ہی خاندان کے چودہ افراد سمیت بتیس افراد جاں بحق ہو گئے۔ ڈسٹرکٹ ہیڈ کوارٹر اسپتال ڈیرہ اسماعیل خان کے ایمرجنسی وارڈ میں خود کش دھماکا دوپہر ڈیڑھ بجے کے قریب ہوا۔ دھماکے سے ایک ہی خاندان کے چودہ افراد سمیت پچیس جاں بحق ہو گئے۔ جبکہ پینتالیس افراد زخمی ہیں۔ ہلاک شدگان میں متعدد پولیس اہلکار بھی شامل ہیں۔ شدید زخمیوں میں ڈی ایس پی ہیڈ کوارٹر ملک مشتاق، گلاب خان جاوید اور ریاض بھی شامل ہیں۔ جنہیں سی ایم ایچ ڈی آئی خان منتقل کر دیا گیا۔ آئی جی سرحد نے آج نیوز سے بات چیت میں کہا کہ دھماکا خود کش حملہ تھا اور حملہ آور کا سر اور ٹانگیں مل گئی ہیں۔

آئی جی سرحد نے دھماکے میں بائیس افراد کے ہلاک ہونے کی تصدیق کی ہے۔ پولیس نے علاقہ گھیرے میں لے کر اسپتال سیل کر دیا ہے۔ دھماکے کے بعد شہر میں سخت کشیدگی ہے اور کاروباری مراکز بند کر دیئے گئے ہیں۔ جبکہ بجلی کی فراہمی بھی معطل ہے۔ تحریک طالبان پاکستان نے دھماکے کی ذمہ داری قبول کرتے ہوئے صوبے کے بڑے شہروں میں مزید خود کش حملوں کی دھمکی دی ہے۔