کوئٹہ: بلوچستان نیشنل پارٹی مینگل نے کہا ہے کہ عطاء اللہ مینگل صدارت کے امیدوار نہیں اور پرویز مشرف کو محفوظ راستہ نہ دیا جائے۔ کوئٹہ میں بی این پی مینگل کے قائم مقام صدر جہانزیب جمالدینی اور دیگر رہنماؤں نے نیوز کانفرنس میں کہا کہ عطاء اللہ مینگل صدارتی امیدوار نہیں۔ جہانزیب جمالدینی نے کہا کہ پرویز مشرف کو محفوظ راستہ دیا گیا تو عوام کا جمہوری حکومت سے اعتماد اٹھ جائے گا۔ انہوں نے کہا کہ قومی مجرم کو گارڈ آف آنر پیش کرنا عوام کی دل شکنی ہے۔ جہانزیب جمالدینی کا کہنا تھا کہ پرویز مشرف نے طاقت کی پالیسی کے تحت اکبر بگٹی اور بالاچ مری سمیت سینکڑوں افراد کا خون بہایا۔ بی این پی رہنماؤں نے حکمران اتحاد سے مطالبہ کیا کہ بلوچستان آپریشن بند اور لاپتہ افراد منظر عام پر لائے جائیں۔ انہوں نے حکمران اتحاد سے مطالبہ کیا کہ پرویز مشرف کے خلاف عالمی عدالت انصاف میں مقدمہ چلایا جائے۔