اسلا م آباد: مسلم لیگ ن اور پیپلز پارٹی نے پرویز مشرف کو قومی مجرم قرار دیتے ہوئے محفوظ راستہ نہ دینے کا مطالبہ کر دیا۔ قومی اسمبلی کے اجلاس میں صدر پرویز مشرف کے استعفے پر بحث میں حصہ لیتے ہوئے مسلم لیگ ن اور پیپلز پارٹی کے ارکان نے سابق صدر کو قومی مجرم قرار دیا۔ ارکان قومی اسمبلی نے کہا کہ آئین، قانون اور پارلیمنٹ توڑنے، اسلامی نظریئے کے خلاف پالیسی اپنانے، جامعہ حفصہ اور وانا سمیت ملک کے دیگر حصوں میں مسلمانوں کا خون بہانے اور عدلیہ کو معزول کرنے جیسے جرائم کے ارتکاب پر سابق صدر مشرف کو محفوظ راستہ نہ دیا جائے بلکہ آئین کے آرٹیکل چھ کے تحت سزا دی جائے۔

ارکان اسمبلی کا کہنا تھا کہ سابق صدر کو محفوظ راستہ دینا سب سے بڑا جرم ہو گا۔ ارکان اسمبلی نے سابق صدر مشرف کو گارڈ آف آنر دیئے جانے پر شدید تنقید کی۔ خواجہ سعد رفیق نے کہا کہ نواز لیگ مشرف کے اقدامات کو تحفظ فراہم کرنے کی کسی کوشش کا حصہ نہیں بنے گی۔ انہوں نے کہا کہ نیا صدر چھوٹے صوبے سے منتخب کیا جانا چاہئے۔ ق لیگ کے ارکان نے کہا کہ حکومت کے لئے مشرف کا بہانہ ختم ہو گیا اب ماضی بھلا کر آگے چلنا چاہئے۔ قومی اسمبلی کا اجلاس بدھ کی شام پانچ بجے دوبارہ ہو گا۔