اسلام آباد: مستعفی صدر پرویز مشرف الوداعی گارڈ آف آنر کے بعد ایوان صدر سے رخصت ہو گئے جس کے بعد محمد میاں سومرو نے قائم مقام صدر کا عہدہ سنبھال لیا۔صدر پرویز مشرف نے قوم سے خطاب میں اپنے عہدے سے استعفے کا اعلان کیا جس کے بعد انہیں ایوان صدر میں الوداعی گارڈ آف آنر پیش کیا گیا۔اس موقع پر تینوں مسلح افواج کے سربراہان کے علاوہ صدارتی ترجمان میجر جنرل راشد قریشی ریٹائرڈ اور دیگر حکام بھی موجود تھے۔

پرویز مشرف نے ایوان صدر کے عملے سے مصافحہ کیا اور گاڑی میں بیٹھ کر آرمی ہاؤس راولپنڈی چلے گئے۔ادھر صدر پرویز مشرف کے استعفے کے بعد چیئرمین سینٹ محمد میاں سومرو نے قائم مقام صدر کی حیثیت سے ذمہ داریاں سنبھال لیں ہیں۔میاں محمد سومرو اس سے قبل گورنر سندھ سمیت اسپیکرقومی اسمبلی ،قائم مقام وزیر اعظم اوردیگرعہدوں پربھی فائز رہے ہیں جبکہ ڈپٹی چیئرمین سینٹ جان محمد جمالی نے قائم مقام چیئرمین سینٹ کی ذمہ داریا ں سنبھال لی ہیں۔