ہنگو: کرم ایجنسی میں جنگ بندی کے لئے جرگہ آج متحارب گروپوں سے مذاکرات کرے گا۔حکومت نے تنازع حل کرنے کے لئے قومی جرگہ کے قیام کا فیصلہ کرلیا ۔کرم ایجنسی کے مختلف علاقوں میں لڑائی جاری ہے،گزشتہ روز ہونے والی جھڑپوں میں تین خواتین سمیت چونتیس افراد ہلاک اور چھیالیس افراد زخمی ہو گئے ۔ہلاک ہونے والوں میں زیادہ تعداد شر پسندوں کی بتائی جاتی ہے۔ادھر متحارب قبائل کے درمیان لڑائی بند کرانے کے لئے امن جرگہ ہنگوکے ناظم حاجی خان افضل کی قیادت میں کرم ایجنسی پہنچ گیا ہے۔جو آج متحارب قبائل سے مذاکرات شروع کرے گا ۔

طوری اور بنگش قبائل نے حکومت کو تعاون کی یقین دہانی کراتے ہوئے کہا ہے کہ شدت پسندوں کے خلاف کارروائی میں تاخیر سے امن و امان کی صورت مزید خراب ہو سکتی ہے۔دوسری جانب مشر داخلہ رحمان ملک نے متحارب گروپوں سے لڑائی بند کرنے کی اپیل کی ہے۔ان کاکہنا ہے کہ وفاقی حکومت نے صوبائی حکومت کی مشاورت سے قومی جرگہ بلانے کا فیصلہ کیا ہے جو جلد ہی کام شروع کر دے گا۔