اسلام آباد: صدر پرویز مشرف کے مستعفی ہونے پر ملک بھر میں جشن منایا گیا اور مٹھائیاں تقسیم کی گئیں۔ عوام نے شکرانے کے نفل ادا کئے۔ جبکہ وکلاء آج یوم نجات منارہے ہیں۔ دارالحکومت اسلام آباد اور راولپنڈی میں صدر پرویز مشرف کے مستعفی ہونے کے اعلان کے ساتھ ہی لوگ خوشی میں گھروں اور دکانوں سے باہر نکل آئے۔ زرداری ہاؤس میں کارکنوں نے مٹھائی تقسیم کی اور بھنگڑے ڈالے۔ پارلیمنٹ ہاؤس کے باہر وکلا، سیاسی جماعتوں اور سول سوسائٹی کے نمائندوں نے خوشی میں مظاہرہ کیا۔ اس موقع پر شکرانے کے نوافل بھی ادا کئے گئے۔ ایبٹ آباد، چکوال اور گجرات میں وکلا، مسلم لیگ ن اور پیپلز پارٹی کے کارکنوں نے ریلی نکالی۔

کراچی میں سیکڑوں سیاسی کارکنوں نے ریلی نکالی۔ انہوں نے ڈھول کی تھاپ پر رقص کیا اور مٹھائی تقسیم کی۔ بلاول ہاؤس پر پیپلز پارٹی کے کارکنان نے زبردست ہوائی فائرنگ کی۔ حیدرآباد سمیت اندرون سندھ سیاسی جماعتوں نے خیر مقدمی ریلیاں نکالیں۔ لاہور کے مختلف علاقوں میں بھی حکومت کی اتحادی جماعتوں کے کارکن سڑکوں پر نکل آئے۔ مٹھائی تقسیم کی اور آتش بازی کا مظاہرہ کیا۔ مال روڈ پر مسلم لیگ ن کے کارکنوں نے نعرے بازی کی۔ پیپلز پارٹی کے کارکنوں نے جشن نجات ریلی نکالی۔ جبکہ جماعت اسلامی کے تحت جلسہ کیا گیا۔

پشاور سمیت صوبہ سرحد میں بھی عوام نے خوشی کا اظہار کیا اور شکرانہ ادا کیا گیا مٹھائیاں تقسیم کی گئیں۔ سیاسی کارکنوں نے پرویز مشرف کے استعفے پر جشن منایا۔ اور اسے ملکی تاریخ میں جمہوری قوتوں کی بڑی فت قرار دیا۔ کوئٹہ میں بھی مٹھائیاں تقسیم کی گئیں اور لوگوں نے خوشی کا اظہار کیا۔ لوگوں کا کہنا ہے کہ پرویز مشرف کے استعفیٰ کا کریڈٹ حکمران اتحاد کو جاتا ہے بلوچستان کے عوام نے اتحادی حکومت سے صدر مشرف کو محفوظ راستہ نہ دینے اور مقدمہ قائم کرنے کا مطالبہ کیا۔