باجوڑ: باجوڑ ایجنسی کے مختلف علاقوں میں سیکورٹی فورسز نے کارروائی کرکے تحریک طالبان پاکستان کے نائب امیر مولوی فقیر محمد اور ترجمان مولوی عمر کے ٹھکانوں سمیت اہم ٹھکانے تباہ کردیئے۔ باجوڑ ایجنسی کے مختلف علاقوں پشت ، سالارزئی ، ماموند اور دیگر علاقوں میں سیکورٹی فورسز نے گن شپ ہیلی کاپٹروں سے کارروائی کی ،اس دوران عسکریت پسندوں کے اہم ٹھکانے تباہ کردیئے گئے ۔

سیکورٹی فورسز نے مختلف مقامات پر گولہ باری میں تحریک طالبان پاکستان کے نائب امیر مولوی عمر کے ٹھکانوں سمیت عسکریت پسندوں کے متعدد ٹھکانے تباہ کردیئے ۔ کارروائی کے دوران تیس کے قریب جنگجو مارے گئے ہیں ۔

دوسری جانب مہمند ایجنسی میں طالبان نے جاسوسی کے شبے میں افغان باشندہ قتل کردیا جبکہ سات ماہ پہلے طالبان نے یرغمال بنائے گئے صوبیدار خالد کو رہا کردیاہے ۔ ادھر خیبر ایجنسی میں پاک افغان بارڈر کے قریب خاتون سمیت دو افراد گرفتار کرلئے ۔ خاتون کا بھارت اور مرد کا جنوبی وزیرستان سے تعلق ہے ۔