لندن: متحدہ قومی موومنٹ کے قائد الطاف حسین نے صدارت کے لئے آصف علی زرداری کا نام تجویز کردیا ہے۔ لندن سے جاری بیان میں الطاف حسین نے کہا کہ چھوٹے صوبے سے اگر صدر کے عہدے کے لئے اخلاقی طور پر کسی کا حق بنتا ہے تو وہ آصف علی زرداری کا ہی ہے۔انہوں نے کہا کہ آصف علی زرداری نے صدر کے مواخذے کے معاملے کو جس خوش اسلوبی سے حل کیا وہ قابل تعریف ہے۔

متحدہ کے قائد کا کہنا تھا کہ سابق صدر پرویز مشرف نے قوم کے وسیع تر مفاد میں ازخود استعفیٰ دے کر ملک کو بہت بڑے بحران سے بچالیا ہے جس پر وہ انہیں خراج تحسین پیش کرتے ہیں۔ انہوں نے تمام سیاسی رہنماؤں سے اپیل کی کہ وہ صدر کے عہدے کیلئے آصف علی زرداری کو نامزد کرکے بینظیر بھٹو کی روح کو سکون پہنچائیں۔

اس سے قبل الطاف حسین نے پاکستان کے یوم آزادی کے سلسلے میں برمنگھم میں ایک اجتماع سے ٹیلی فونک خطاب کے دوران کہاکہ کشمیرکافیصلہ پاکستان اور بھارت کے بجائے کشمیری عوام کو کرنا ہے۔ انہوں نے مسئلہ کشمیر کے حل کیلئے کشمیری عوام کی رائے کوفوقیت دینے پر زور دیا۔الطاف حسین نے کہا کہ گزشتہ ساٹھ سال سے زائد عرصے میں ایک لاکھ سے زائد کشمیری قتل کردیے گئے ،اس کے باوجودآج تک مسئلہ کشمیر حل نہیں کیا جاسکا اور سب نے کشمیری عوام کو اپنے مفادات کے لیے استعمال کیا۔