لندن: برطانیہ نے پاکستان کے سابق صدر پرویز مشرف کے استعفیٰ میں کردار ادا کرنے کا پہلی مرتبہ اعتراف کرلیا ہے۔ برطانوی دفتر خارجہ کی جانب سے جاری کردہ بیان میں کہا گیا ہے کہ برطانیہ کی شدید خواہش تھی کہ پاکستان کی منتخب حکومت اور سابق فوجی صدر کے درمیان تصادم کی صورت حال پیدا نہ ہو تاہم بیان میں یہ کہا گیا ہے کہ پاکستان کو بحران سے نکالنے کے لئے ملک کی اعلیٰ قیادت کو کوئی مخصوص فارمولا پیش نہیں کیا گیا۔

اس سے پہلے اعتزاز احسن نے بی بی سی نیوز سے گفتگو میں پرویز مشرف اور حکومت کے درمیان مبینہ ڈیل میں برطانوی دفتر خارجہ کے سینئر اہلکار مارک لائل گرانٹ کے کردار پر کڑی تنقید کی تھی۔ اعتزاز کا کہنا تھا کہ مارک گرانٹ نے یہ ڈیل کروا کے پاکستانی قانون کی دھجیاں بکھیر دی ہیں۔