اسلام آباد: مسلم لیگ ق کے صدر چوہدری شجاعت حسین نے کہا ہے کہ صدارتی امیدوار ضرور لائیں گے لیکن ووٹ ایسے امیدوار کو دیا جائے گا جو وفاق کی علامت ہو گا ۔اسلام آباد میں ق لیگ کی سینٹرل ایگزیکٹو کمیٹی کے اجلاس کے بعد میڈیا کو بریفنگ دیتے ہوئے چوہدری شجاعت حسین نے کہا کہ ان کی جماعت ملک میں نئی امید لے کر آئے گی اور ثابت کرے گی کہ وہ اسٹیبلشمنٹ کے بغیر بھی چل سکتی ہے ۔انہوں نے کہا کہ حکمران اتحاد مشرف کے استعفے کے بعد چوبیس گھنٹوں میں ججوں کی بحالی اور مہنگائی میں کمی کے وعدے پورے کرے ۔اس موقعے پر ق لیگ کے سیکریٹری جنرل مشاہد حسین نے کہا کہ سیاستدان پاکستان میں رہ کر پارلیمنٹ میں مشاورت کے بعد فیصلے کریں ۔انہوں نے کہا کہ مشرف کے جانے کا معاملہ اچھی طرح سے طے پاگیا ماضی کی طرح گند نہیں ڈالا گیا ۔انہوں نے کہا کہ مسلم لیگ ق نے پرویز مشرف کے تمام فیصلوں کی ہمیشہ تائید کی ہے۔