کراچی: سپریم کورٹ بار ایسوسی ایشن کے صدر اعتزاز احسن نے کہا ہے کہ تین نومبر کے اقدام کو درست تسلیم کرنے کا مطلب مستقبل میں طالع آزما کو خوش آمدید کہنا ہے۔ اعتزاز احسن قومی رابط کونسل میں شرکت کے لئے کراچی پہنچے تھے ۔

جناح انٹرنیشنل ائیرپورٹ پہنچنے پر میڈیا سے گفتگو کرتے ہوئے اعتزاز احسن نے کہا کہ ججوں کی بحالی کی تحریک وکلا کی نہیں بلکہ عوام کی ضرورت ہے،تین نومبر کے اقدام درست تسلیم کرلئے جائیں تو اس کا مطلب ہوگا کہ کوئی بھی طالع آزما مارشل لاء لگاکر ججوں اور ارکان پارلیمنٹ کو برطرف کرسکتا ہے جس کے خلاف کوئی تحریک نہیں چلائے گا،دوبارہ حلف اٹھانے والے ججوں نے اپنی برطرفی کو درست اقدام تسلیم کرلیا۔

اعتزاز احسن نے کہا کہ ججوں کی دوبارہ حلف برداری سے حکومت پر دباؤ میں کمی آئی ہے۔ انہوں نے کہا کہ اگر عدلیہ آزاد ہوتی تو مہنگائی کے خلاف احتسابی ادارے کا کردار ادا کرتی۔