باجوڑایجنسی: باجوڑ ایجنسی میں ڈیڈ لائن ختم ہونے کے بعد پولیٹیکل انتظامیہ نے درجنوں افغان مہاجرین گرفتار کر لئے۔ عسکریت پسندوں کے پانچ گھروں کو جلا دیا گیا۔ باجوڑ ایجنسی میں افغان مہاجرین کو علاقہ خالی کرنے کے لئے پولیٹیکل انتظامیہ اور قبائلی عمائدین کی طرف سے دی گئی ڈیڈ لائن میں توسیع کر دی گئی تھی جو آج ختم ہو گئی۔ جس کے بعد افغان ماہرجین کے خلاف پولیٹیکل انتظامیہ کا کریک ڈاؤن جاری ہے۔ اب تک درجنوں افغان مہاجرین کو گرفتار کیا جا چکا ہے۔

باجوڑ ایجنسی کے علاقے عنایت قلعہ میں قبائلی لشکر نے افغان مہاجرین کے خلاف کارروائی کی اور افغان ماہرجین کے سو سے زائد خاندانوں کو علاقے سے نکال دیا۔ اس موقع پر قبائلی عمائدین نے اعلان کیا کہ وہ عسکریت پسندوں کے خلاف آپریشن میں سیکورٹی فورسز کا ساتھ دیں گے۔ مومند کے علاقے میں قبائل نے عسکریت پسندوں کے خلاف کارروائی کرتے ہوئے پانچ عسکریت پسندوں کے گھر جلا دیئے جن میں عسکریت پسند کمانڈر جان ولی کا گھر بھی شامل ہے۔