لاہور: لاہور پولیس نے بوگس فون کالز کے ذریعے خوف وہراس پھیلانے کے الزام میں ساڑھے پانچ ہزار سے زائد ٹیلی فون بلاک کر دیئے جبکہ متعدد افراد کو گرفتار کر کے دہشت گردی کی ایکٹ کے تحت مقدمات درج کر لیے گئے ہیں۔ یہ بات سی سی پی او لاہور پرویز راٹھور نے آج نیوز سے گفتگو کرتے ہوئے کہی۔ انہوں نے کہا کہ ون فائیو پر روزانہ موصول ہونے والی ایک لاکھ سے زائد ٹیلی فون کالز میں ننانوے فی صد جھوٹی ہوتی ہیں۔ ان کا کہنا تھا کہ اب تک ساڑھے پانچ ہزار سے زائد افراد کے ٹیلی فون بلاک کیے جا چکے ہیں۔ انہوں نے بتایا کہ پچھلے ایک ماہ کے دوران بم کی غلط اطلاع والی پندرہ فون کالز آئیں جن میں سے متعدد ٹریس کر کے تین افراد کو گرفتار کر لیا گیا ہے جبکہ ان کے خلاف دہشت گردی اور ٹیلی گراف ایکٹ کے تحت مقدمات درج کئے گئے ہیں۔