اسلام آباد: رمضان المبارک کا مہینہ ختم ہوتے ہی ملک بھر میں بجلی کی لوڈ شیڈنگ دوبارہ شروع کردی گئی ہے اور ایک ماہ سکون کا سانس لینے والے عوام پھر عذاب میں مبتلا ہوگئے ہیں۔ عید کے بعد بجلی فراہم کرنے والی کمپنیوں نے لوڈ شیڈنگ کا نیا شیڈول جاری کردیا ہے جس کے تحت ملک بھر میں یومیہ تین سے چار گھنٹے لوڈ شیڈنگ کی جائے گی۔

بجلی سپلائی کمپنیوں کے مطابق لوڈ شیڈنگ کی وجہ بجلی کی طلب میں اضافہ اور پیداوار میں کمی ہے۔ مجموعی طور پر پچیس سو میگاواٹ سے زائد بجلی کی قلت کا سامنا ہے۔ اکتوبر کا مہینہ شروع ہونے کے باوجود موسم بدستور خشک اور گرم ہے، ایسے میں پھر سے بجلی کی لوڈ شیڈنگ کسی عذاب سے کم نہیں۔

اسلام آباد الیکٹرک سپلائی کارپوریشن ریجن میں یومیہ تین گھنٹے جبکہ پیپکو ریجن میں چار گھنٹے کی لوڈ شیڈنگ کی جارہی ہے۔ حکومت نے جولائی میں بجلی کے نرخ بڑھا کر عوام کو جھٹکا تو لگا دیا تھا لیکن تاحال ایسے ٹھوس اقدامات نہیں کئے گئے جن سے لوگوں کو لوڈ شیڈنگ کے عذاب سے نجات مل سکے۔ بجلی کے بحران سے صنعتی و زرعی شعبہ بری طرح متاثر ہورہا ہے جس کے منفی اثرات براہ راست ملکی معیشت پر پڑ رہے ہیں۔