بھکر: وزیر اعلیٰ پنجاب شہباز شریف نے کہا ہے کہ بھکر خودکش حملے کی اعلیٰ سطح پر تحقیقات کی جائیں گی اور دہشت گردوں کا نیٹ ورک توڑ دیا جائے گا۔ وہ نوانی ہاوٴس بھکر میں خود کش حملے کے دوران جاں بحق ہونے والوں کے لواحقین سے تعزیت اور ڈسٹرکٹ ہیڈ کوارٹرز ہسپتال میں زخمیوں کی عیادت کے بعد میڈیا سے بات چیت کر رہے تھے۔ شہباز شریف نے کہا کہ دہشت گرد معاشرے کے لئے ناسور ہیں اور پنجاب حکومت دہشت گردی کو جڑ سے اکھاڑنے کے لئے موٴثر اقدامات کر رہی ہے۔ وزیر اعلیٰ نے کہا کہ دہشت گردی کے چلینج سے نمٹنے کے لئے متعلقہ اداروں کو صوبے میں فول پروف سیکو رٹی کے لئے سخت ہدایات جاری کر دی گئی ہیں۔ انہوں نے بم دھماکے میں جاں بحق ہونے والوں کے لواحقین کو پانچ پانچ لاکھ اور زخمیوں کو دو دو لاکھ روپے کے چیک بھی دیئے۔