راولپنڈی: پاکستان ایکس سروس مین ایسوسی ایشن نے پارلیمنٹ کے دونوں ایوانوں کو ان کیمرہ بریفنگ دینے کا خیر مقدم کیا ہے ۔ پاکستان ایکس سروس مین ایسوسی ایشن کا اجلاس راولپنڈی میں لیفٹیننٹ جنرل ریٹائرڈ حمید گل کی صدارت میں ہوا ۔ اجلاس کے بعد جاری بیان میں کہا گیا کہ منتخب ارکان ان کیمرہ بریفنگ کے بعد جامع قومی پالیسی تشکیل دیں ۔حکومت امریکا کو پاکستانی حدود میں کارروائی کی اجازت دینے یا نہ دینے کے حوالے سے اپنی پوزیشن واضح کرے ۔ بیان میں کہا گیا کہ قبائلی علاقوں میں طاقت کے استعمال کی پالیسی پر نظر ثانی کی ضرورت ہے ۔ دہشت گردی کے خلاف جنگ میں بہتر حکمت عملی استعمال کی جائے ۔ بیان میں کشمیر پالیسی پر دوٹوک موقف اختیار کرنے کی ضرورت پر زور دیا گیا ۔