کوئٹہ: بلوچستان حکومت نے آج ٹی وی پر رپورٹ نشر ہونے کے بعد معذور مصورہ شازیہ بتول کو اسکالر شپ دے دی۔ بلوچستان حکومت نے آج ٹی وی پر شازیہ بتول کے بارے میں رپورٹ شائع ہونے کے بعد شازیہ بتول سے رابطہ کیا۔ معذور مصورہ شازیہ نے منگل کو ساروان ہاؤس میں وزیراعلیٰ بلوچستان نواب اسلم رئیسانی سے ملاقات کی اور انہیں اپنی اسناد پیش کیں۔ جس پر وزیراعلیٰ نے شازیہ بتول کو فوری طور پر بلوچستان حکومت کی جانب سے اسکالر شپ دینے کا اعلان کیا۔

ان کا کہنا تھا کہ وہ پنجاب یونیورسٹی میں داخلے کے لئے وزیراعلیٰ پنجاب سے ذاتی طور پر درخواست کریں گے۔ اس موقع پر شازیہ بتول نے وزیراعلیٰ بلوچستان اور آج ٹی وی کا خصوصی شکریہ ادا کیا۔ نواب زادہ اسلم رئیسانی کے بھائی سراج رئیسانی نے اس موقع پر آج نیوز سے بات چیت کرتے ہوئے کہا کہ شازیہ بتول جیسی باہمت بچیاں قوم کا سرمایہ ہیں اور ان کی مدد کرنا حکومت کی ذمہ داری ہے۔ بلوچستان حکومت کی جانب سے اسکالر شپ ملنے کے بعد شازیہ بتول کو امید ہے کہ وہ اب اعلیٰ تعلیم کے حصول کا خواب پورا کر سکے گی۔