اسلام آباد: وزیر دفاع چوہدری احمد مختار نے کہا ہے کہ چوبیس نومبر کو آئی ایم ایف کے ساتھ معاہدہ ہوجائے گااور اسی دن پہلی قسط اسٹیٹ بینک کے اکاؤنٹ میں منتقل ہوجائے گا۔ اسلام آباد میں تقریب کے بعد میڈیا سے گفتگو میں وزیر دفاع نے بتایا کہ آئی ایم ایف نے دفاعی بجٹ میں کمی کے حوالے سے کوئی شرط نہیں رکھی صرف دو فیصد شرح سود بڑھانے کی بات کی گئی تھی جس سے انفلیشن کو کنڑول کرنے میں مددملے گی ۔

ایک سوال کے جواب میں وزیر دفاع کا کہنا تھا کہ پاکستانی علاقوں میں کارروائی کے لئے امریکا کے ساتھ کوئی معاہدہ نہیں ہوا ۔ پاکستان ہر فورم پر پاکستانی حدود کی خلاف ورزی کے خلاف آواز اٹھائے گا ۔ انہوں نے کہا کہ آرمی چیف برسلز میں نیٹو افواج کے اجلاس میں بھی فضائی حملوں کا معاملہ اٹھائیں گے ۔ احمد مختار کا کہناتھا کہ دہشت گردی کے خلاف جنگ کی حالیہ پالیسی کے بارے میں عسکری اور سیاسی قیادت کی سوچ میں فرق نہیں ہے اور دہشت گردی کے خاتمے تک لڑائی جاری رہے گی ۔