لندن: متحدہ قومی موومنٹ کے قائد الطاف حسین نے باجوڑ ایجنسی کی مسجد اور ڈیرہ اسماعیل خان میں جنازہ میں خود کش دھماکوں کی مذمت کی ہے۔ لندن سے جاری ایک بیان میں انہوں نے کہا کہ جو عناصر بھی بربریت کا یہ عمل کر رہے ہیں وہ مسلمان تو کجا انسان بھی کہلانے کے مستحق نہیں۔

انہوں نے کہا کہ جو عناصر بھی اسلام کا نام لے کر خودکش دھماکے کر رہے ہیں اور خود کش دھماکے کرنے والوں کی حمایت کر رہے ہیں وہ اسلام اور پاکستان کے دوست نہیں بلکہ دنیا بھر میں اسلام اور پاکستان کو بدنام کر رہے ہیں۔ الطاف حسین نے کہا کہ وقت کا تقاضا ہے کہ معاشرے کے تمام طبقوں اور شعبوں سے تعلق رکھنے والے افراد معصوم انسانوں کے قتل عام کے خلاف احتجاج کریں۔