لاہور: مسلم لیگ ق کے ناراض اراکین نے سی ای سی کے اجلاس میں شرکت اور پارٹی کو مضبوط بنانے کے لئے تجاویز دینے کا فیصلہ کر لیا۔ اسلام آباد میں حامد ناصر چٹھہ کی رہائش گاہ پر ق لیگ کے ناراض اراکین کا اجلاس ہوا۔ اجلاس میں اکرم زکی، سمیرا ملک، سینیٹر سلیم سیف اللہ، ہمایوں اختر، محمد علی درانی، عظیم چوہدری، اقبال ڈار اور دیگر نے شرکت کی۔ ذرائع کاکہنا ہے کہ اجلاس میں ناراض اراکین نے اختلافات میڈیا میں نہ لانے کا فیصلہ کیا۔ اجلاس کے بعد میڈیا سے بات چیت میں ق لیگ کے رہنما اکرم زکی نے کہا کہ سی ای سی کے اجلاس میں ہونے والے تمام فیصلوں کی پاسداری کی جائے گی۔ اجلاس میں ناراض ارکان کو واپس لانے سمیت تمام اختلافی امور پر بات چیت کی جائے گی اور پارٹی کو فعال بنانے کے لئے تجاویز دی جائیں گی۔