لاہور: گورنر پنجاب سلمان تاثیر نے کہا ہے کہ وہ پنجاب کو پیپلز پارٹی کا گڑھ بنائیں گے اور لاہور سے بلاول بھٹو کو الیکشن لڑا کر وزیراعظم بنوایا جائے گا۔ وہ رحیم یار خان پیپلز پارٹی کے کارکنوں سے خطاب کر رہے تھے۔ سلمان تاثیر نے کہا کہ گورنر کا عہدہ سنبھالتے ہی انہوں نے پنجاب کو پیپلز پارٹی کا گڑھ بنانے کا عہد کیا تھا اور وہ اسے پورا کریں گے۔انہوں نے کہا کہ بینظیر بھٹو کی شہادت اور انتخابی نتائج کے بعد صدر آصف علی زرداری کی سیاسی سوچ نے ملک کو بچایا ہے۔ ان کا کہنا تھا کہ پارٹی کے شریک چیئرمین نے صوبہ سرحد میں اے این پی،سندھ میں ایم کیو ایم کو حکومتی اتحاد میں شامل کیا جبکہ پنجاب میں ن لیگ کو اقلیت میں ہونے کے باوجود حکومت بنانے کی دعوت دی۔ گورنر نے کہا کہ پیپلز پارٹی کی حکومت اپنی پانچ سالہ مدت پوری کرے گی۔