اسلام آباد: دفتر خارجہ نے کہا ہے کہ سعودی عرب میں منشیات ا سمگلنگ کیس میں گرفتار پانچ پاکستانی بے قصور ہیں۔ سعودی حکام اصل ملزمان کو انصاف کے کٹہرے تک لانے کے لئے مکمل تعاون کررہے ہیں۔دفتر خارجہ سے جاری بیان کے مطابق وزیر اعظم یوسف رضا گیلانی نے معاملہ کا فوری نوٹس لیتے ہوئے وزارت خارجہ، داخلہ اور اینٹی نارکوٹکس فورس کو اس کیس کو جلد مکمل کرنے کی ہدایت کی ہے۔

بیان میں کہا گیا ہے کہ ابتدائی تحقیقات کے مطابق سعودی عرب میں قید پاکستانی بے قصور ہیں اور اس حوالے سے سعودی حکومت کو سفارتی چینلز کے ذریعے آگاہ کر دیا گیا ہے۔ بیان میں کہا گیا ہے کہ سعودی حکومت نے پاکستان کی درخواست کا مثبت جواب دیا ہے۔ بیان کے مطابق جدہ میں پاکستانی قونصلیٹ سعودی حکام کے ساتھ مسلسل رابطے میں ہے تاکہ بے گناہ پاکستانیوں کو جلد از جلد واپس وطن لایا جاسکے۔