کراچی : عاشور کے جلوس میں ہونے والے بم دھماکے کے شہدا کو کراچی اور ملک کے مختلف شہروں میں سپرد خاک کردیا گیا۔ ایم اے جناح روڈ پر دس محرم کے جلوس میں دھماکے سے شہید چوالیس میں سے پانچ کی اجتماعی نماز جنازہ محفل شاہ خراسان امام بارگاہ کے باہر ادا کی گئی۔ نماز جنازہ کی امامت شیخ صلاح الدین نے کی۔ نماز جنازہ میں کثیر تعداد میں علما کرام، سیاسی اور مذہبی تنظیموں کے عہدیداروں اور ایدھی فاؤنڈیشن کے سربراہ عبدالستار ایدھی سمیت ہزاروں افراد نے شرکت کی۔ نماز جنازہ کے بعد جیسے ہی جنازے اٹھے تو ہر آنکھ اشکبار تھی۔

شہدا میں سے تین کو حسین باغ میوہ شاہ جب کہ دو کو وادی حسین سہراب گوٹھ قبرستان میں سپردخاک کیا گیا۔ کراچی دھماکے میں شہید ہونے والے دو طالبعلموں کوآبائی قبرستان اسکردو میں سپرد خاک کردیا گیا ہے۔ طالبعلم عامر حسن اور محمد جوکا تعلق اسکردو سے تھا۔ دونوں طالب علموں کی نمازجنازہ مرکزی جامع مسجد میں ادا کی گئیں جس میں ہزاروں افراد نے شرکت کی۔ بعد ازاں میتوں کو آبائی قبرستان میں سپرد خاک کردیا گیا۔ چھ شہدا کو چکوال میں سپرد خاک کیا گیا۔