کراچی: وزیراعلیٰ سندھ قائم علی شاہ نے کراچی میں عاشور کے روز بم دھماکے اور لوٹ مار کے واقعات کی رپورٹ تین دن میں طلب کرلی۔ کراچی میں وزیر اعلیٰ ہاوٴس میں امن و امان سے متعلق اہم اجلاس میں یوم عاشور پر دہشت گردی اور لوٹ مار کے واقعات کا جائزہ لیا گیا۔ وزیراعلیٰ سندھ نے سانحہ پر افسوس کا اظہار کرتے ہوئے کہا کہ ملک دشمن قوتیں اور سماج دشمن عناصر معصوم اور بے گناہ عوام کے جانی و مالی نقصان میں ملوث ہیں۔

وزیراعلیٰ سندھ نے اجلاس کے شرکاء سے یوم عاشور پر بم دھماکے اور اس کے بعد ہونے والی لوٹ مار اور آتشزدگی کے واقعات پر تفصیلی بریفنگ لی اور آئی جی سندھ پولیس کو ہدایت کی کہ اس ضمن میں تین دن کے اندر رپورٹ پیش کی جائے۔ انہوں نے محکمہ پولیس اور رینجرز کے ذمہ داران پر زور دیا کہ وہ پوری ذمہ داری سے فرائض انجام دیں اور شہر میں امن و امان کا قیام یقینی بنائیں۔

اس سے پہلے ٹھٹہ میں صحافیوں سے بات چیت کرتے ہوئے وزیراعلیٰ نے کہا کہ سانحہ کراچی میں منصوبہ بندی کے ذریعے اربوں روپے کا نقصان کیا گیا۔انہوں نے کہا کہ کراچی بم دھماکے کے اہم شواہد مل گئے ہیں جلد ماسٹر مائنڈ تک پہنچ جائیں گے۔ دھماکے کی فوٹیج کے ذریعے دہشتگردوں کے قریب پہنچ چکے ہیں۔