اسلام آباد: وزیراعظم یوسف رضا گیلانی نے پاکستان کرکٹ بورڈ کے آئین کو معطل کر کے بورڈ کے انتظامی امور چلانے کے لئے ایڈہاک کمیٹی قائم کرنے کی منظوری دے دی۔ سرکاری خبررساں ایجنسی کے مطابق وزیر اعظم سید یوسف رضا گیلانی نے پاکستان کرکٹ برورڈ کے انتظامی امور چلانے کے لئے ایڈہاک کمیٹی قائم کرنے کی منظوری دے دی۔ وفاقی وزیر کھیل نجم الدین خان نے پارلیمنٹ ہاؤس میں صحافیوں سے بات چیت کرتے ہوئے بتایا کہ ایڈہاک کمیٹی میں عمران خان، ماجد خان اور دیگر نامور سابق کھلاڑیوں کو شامل کرنے پر غور کیا جا رہا ہے۔ انہوں نے کہا کہ ایڈہاک کمیٹی پی سی بی کے امور کار کو چلانے اور کھیل کے گرتے ہوئے معیار کو بہتر بنانے کے علاوہ بورڈ کے آئین میں ضروری ترمیم بھی تجویز کرے گی۔

نجم الدین خان نے کہا کہ اس سلسلے میں منگل کو وزارت کا اجلاس بھی ہوا۔ جس میں پی سی بی کا آئین معطل کر کے ایڈہاک کمیٹی بنانے کے لئے انیس سو تہتر کے آئین کے رول آف بزنس کا جائزہ لیا گیا اور دیگر امور زیر بحث آئے۔ وفاقی وزیر کھیل نے کہا کہ وہ اس سلسلے میں جلد بازی سے کام نہیں لینا چاہتے۔ امید ہے کہ آئندہ چند دنوں میں تمام امور کو طے کر لیا جائے گا۔ ایک سوال پر ان کا کہنا تھا کہ کرکٹ بورڈ کے انتظامی امور اور کھیل کے گرتے ہوئے معیار کو بہتر بنانے کے لئے ایڈہاک کمیٹی قائم کرنا ضروری ہو گیا ہے۔