لاہور: فاسٹ باؤلر محمد آصف کے بی سیمپل کا ڈوپ ٹیسٹ بھی مثبت آیا ہے۔انڈین کرکٹ لیگ کے دوران محمد آصف کا ڈوپ ٹیسٹ لیا گیا جس کا نتیجہ مثبت آنے پر پاکستان کرکٹ بورڈ نے ان پر پابندی عائد کر دی تھی۔ محمد آصف نے نتیجہ چیلنج کرتے ہوئے بی سیمپل کا ٹیسٹ کرانے کا فیصلہ کیا جو سوئٹزرلینڈ کے شہر لوزان کی لیبارٹری میں ان کے وکیل شاہد کریم اور ڈاکٹر کی موجودگی میں ہوا۔ اس ٹیسٹ کے مطابق محمد آصف کے جسم میں ممنوعہ دوا نینڈرولون کی مقدار پانچ اعشاریہ چار نینوگرام پائی گئی جبکہ اے سیمپل میں یہ مقدار چھ اعشاریہ دو تھی۔

لوزان سے ٹیلیفون پر بات کرتے ہوئے محمد آصف نے کہا کہ بی سیمپل میں ممنوعہ دوا کی مقدار میں فرق ثابت ہونا خوش آئند ہے۔ ان کا کہنا تھا کہ وہ اس فرق کو چیلنج کریں گے اور امید کرتے ہیں کہ انہیں ڈوپ کیس سے بری کر دیا جائے گا۔