لاہور: سابق اولمپیئن خواجہ جنید نے بیجنگ اولمپکس میں پاکستانی ٹیم کی ہالینڈ کے ہاتھوں شکست کے بعد چیمپئنز ٹرافی سے باہر ہونے کو المیہ قراردیا ہے۔لاہور میں آج نیوز سے گفتگو کرتے ہوئے خواجہ جنید نے پاکستان ہاکی ٹیم کی دنیائے کھیل کے سب سے بڑے ایونٹ میں ناقص پرفارمنس کو سخت تنقید کا نشانہ بنایا، اور کہا کہ کمزور دفاع اور اٹیک، پنلٹی کارنرز پر گول ضائع کرنا اور مڈفیلڈ کا ناقص کھیل پاکستان کی شرمناک شکستوں کا باعث بنا۔ ان کا کہناتھا کہ فیڈریشن میں تبدیلی برائے تبدیلی نہیں ہونی چاہئے بلکہ قومی کھیل کو دوبارہ عروج پر لانے کیلئے ٹھوس اقدامات کرنے چاہئیں۔ انہوں نے کہا کہ حکومت قومی کھیل کی بھرپور سرپرستی کرے اور پورے ملک میں ہاکی کا ایک ہی کلچر متعارف کرایا جائے۔ اسی صورت میں پاکستان ہاکی میں اپنا کھویا ہوا مقام دوبارہ حاصل کرسکتا ہے۔