لاہور: وزارت کھیل نے سابق ٹیسٹ کرکٹر اعجاز بٹ کو پاکستان کرکٹ بورڈ کا نیا چیئرمین مقرر کر دیا۔ پاکستان کرکٹ بورڈ کے چیف آپریٹنگ آفیسر شفقت نغمی نے اعجاز بٹ کو پی سی بی کا نیا چیئرمین مقرر کئے جانے کی تصدیق کر دی ہے۔ ستر سالہ وکٹ کیپر بیٹسمین اعجاز بٹ نے انیس سو انسٹھ میں ویسٹ انڈیز کے خلاف ٹیسٹ میچ کھیل کر اپنے کیریئر کا آغاز کیا ۔انہوں نے اپنا آخری ٹیسٹ انیس سو باسٹھ میں انگلینڈ کے خلاف کھیلا تھا۔ اعجاز بٹ نے آٹھ ٹیسٹ میچز میں پاکستان کی نمائندگی کرتے ہوئے دو سو سولہ رنز اسکور کئے۔ سابق وکٹ کیپر بیٹسمین ماضی میں پاکستان کرکٹ بورڈ کے سیکریٹری کے فرائض بھی انجام دے چکے ہیں۔