اسلام آباد: پاکستان ہاکی ٹیم کے کپتان شکیل عباسی نے کہا کہ قومی ٹیم کی کارکردگی بہتر بنانے کے لئے کوچ کے عہدے کی معیاد کم از کم دو سے تین سال ہونی چاہئے۔ جرمنی میں ہیمبرگ ماسٹرز ہاکی ٹورنامنٹ میں شرکت کے بعد اسلام آباد ایئرپورٹ آمد پر میڈیا سے بات چیت کرتے ہوئے شکیل عباسی نے کہا کہ کوچ کا عہدہ دو سے تین سال تک کے لئے ہونا چاہئے تاہم کوچ ملکی ہو یا غیر ملکی اس کا فیصلہ کرنا پاکستان ہاکی فیڈریشن کی صوابدید ہے۔ ایک سوال پرشکیل عباسی نے کہا کہ ہیمبرگ ماسٹر ٹورنامنٹ میں سینئر کھلاڑیوں کی کمی محسوس ہوئی اور سرد موسم اور بارش کی وجہ سے بھی کھلاڑیوں کو کھیلنے میں مشکلات پیش آئیں۔ انہوں نے کہا کہ ایشیا کپ کے لئے مضبوط ٹیم میدان میں اتارنا ہو گی۔