بنگلور: سابق بھارتی کپتان سارو گنگولی نے آسٹریلیا کے خلاف ٹیسٹ سیریز کے بعد انٹرنیشنل کرکٹ سے ریٹائرمنٹ لینے کا اعلان کر دیا۔ بنگلور میں نیوز کانفرنس سے خطاب کرتے ہوئے سارو گنگولی نے کہا کہ رواں ماہ آسٹریلیا سے ہونے والی ٹیسٹ سیریز کے بعد وہ کرکٹ کو خیرباد کہہ دیں گے۔ گنگولی نے خواہش ظاہر کی کہ وہ آسٹریلیا کے خلاف سیریز میں کامیابی حاصل کر کے اپنے کیریئر کا اختتام کرنا چاہتے ہیں۔ میں نے آسٹریلیا کے خلاف ٹیسٹ سیریز کے بعد کرکٹ سے ریٹائرمنٹ لینے کا فیصلہ کر لیا ہے۔ میری خواہش ہے کہ میں ورلڈ چیمپئن کے خلاف اپنے کیریئر کا اختتام فاتحانہ انداز سے کروں۔

چھتیس سالہ بھارتی کھلاڑی نے انیس سو چھیانوے میں انگلینڈ کے خلاف ٹیسٹ ڈیبیو کیا اور پہلے ٹیسٹ میں انہوں نے سنچری اسکور کی تھی۔ گنگولی نے اپنے بارہ سالہ ٹیسٹ کیریئر میں چھ ہزار آٹھ سو اٹھاسی رنز اسکور کئے جس میں پندرہ سنچریاں اور چونتیس نصف سنچریاں شامل ہیں۔ گنگولی ٹیسٹ کیریئر میں بھارت کے سب سے کامیاب ترین کپتان بھی رہے ہیں انہوں نے اننچاس ٹیسٹ میں بھارت کے لئے اکیس میچز میں کامیابیاں حاصل کیں جو بھارتی کھلاڑی کا بطور کپتان ایک ریکارڈ ہے۔