اسلام آباد: پاکستان بلیئرڈ اسنوکر ایسوسی ایشن کی رکنیت تاحال بحال نہ ہونے کے سبب قومی کیوئیسٹ کی عالمی چیمپیئن شپ میں شرکت مشکوک ہوگئی ہے۔ستائیس اکتوبر سے آسٹریا کے شہر ویلز میں ہونے والے تیرہ روزہ مقابلوں میں پاکستان کی نمائندگی سابق عالمی نمبر دو صالح محمد اور خرم آغا کو کرنی ہے۔لیکن پاکستان اسپورٹس بورڈ کی جانب سے اسنوکر ایسوسی ایشن کی رکنیت تاحال بحال نہ کیے جانے کے سبب عالمی چیمپیئن شپ میں پاکستانی کیوئیسٹ کی شرکت مشکوک ہوکر رہ گئی ہے۔پی بی ایس اے کے نو منتخب صدر عالم گیر شیخ نے بتایا کہ انہوں نے متعلقہ دستاویزات پاکستان اسپورٹس بورڈ کے پاس جمع کرادیئے ہیں۔اگر اسنوکر ایسوسی ایشن کی رکنیت بحال نہ ہوئی تو بیس سال میں یہ پہلا موقع ہوگا جب پاکستانی کیو ئیسٹ عالمی ایونٹ میں نمائندگی سے محروم رہیں گے ۔گزشتہ سال تھائی لینڈ میں ہونے والے ٹورنامنٹ میں صالح محمد اور عمران شہزاد نے ملک کی نمائندگی کی تھی۔